திண்டிவனம் - வணிக வளாகம் கட்டப்படுவதை நகராட்சியும், தமிழக அரசும் தடுத்து நிறுத்த வேண்டும்

திண்டிவனம் காந்தி சிலை அருகில் வணிக வளாக கட்டப்படுவதை திண்டிவனம் நகராட்சியும், தமிழக அரசும் தடுத்து நிறுத்த வேண்டும்.

திண்டிவனம் மாவட்ட தலைமை மருத்துவமனை மற்றும் பொதுப் போக்குவரத்திற்கு இடையூறாக அமைவதுடன், ஆபத்துகளை ஏற்படும் இக்கட்டிடத்தை வேறு இடத்திற்கு மாற்ற வேண்டும்.

-----------------------------------

காந்தி சிலை என்பது திண்டிவனத்தின் அடையாளம். இதற்கு பின்பகுதியில் திண்டிவனம் நகராட்சியின் பழைய கட்டிடம் இருந்தது. இதனை இடித்துவிட்டு தற்போது ரூ 77 லட்சத்தில் கலைஞர் நகர்ப்புற மேம்பாட்டு திட்டத்தின் கீழ் புதிய வணிக வளாகம் கட்டும் பணி நேற்று தொடங்கியுள்ளது.

இந்த வணிக வளாகத்தினால் திண்டிவனம் நகரத்திற்கோ, பொது மக்களுக்கோ, வணிகர்களுக்கோ ஒரு சத வீத பயன், நலன் கிடைக்கப்போவதில்லை. மாறாக ஏற்கனவே போக்குவரத்து நெருக்கடியில் சிக்கி விழிபிதுங்கி மூச்சுத் திணறும் திண்டிவனம் நகரம், இந்த வணிக வளாகத்தினால் மேலும் நெருக்கடிகளுக்கும், பேராபத்திற்கும் ஆளாகும்.

காந்தி சிலை 5 முனை சந்திப்பாக உள்ளது. அரசு கலை மற்றும் பொறியியல் கல்லூரிகளுக்கும், 100 கணக்கான கிராமங்களுக்கும் செல்லும் கல்லூரி சாலை இடது பக்கம் உள்ளது. மாவட்ட தலைமை மருத்துவமனைக்கும், பல்வேறு கிராமங்களுக்கும் செல்லும் பாஞ்சாலம்/மருத்துவமனை சாலை வலது பக்கம் உள்ளது. செஞ்சி, திருவண்ணாமலை மற்றும் சென்னை, புதுச்சேரி, திருச்சி, சேலம் செல்லும் இருவழி நெடுஞ்சாலை மற்றும் செஞ்சி, நேருவீதி செல்லும் ஒருவழிச் சாலை என இவ்விடத்தில் ஐந்து முனை சந்திப்பு சாலைகள் உள்ளது.

மேலும் இந்த 5 முனை சாலை வழியாகத்தான் திண்டிவனத்தில் உள்ள 20 க்கும் மேற்பட்ட பள்ளிகளுக்கும், 2 அரசு கல்லூரி, 3 தனியார் கல்லூரிகளுக்கும் மாணவர்கள் சென்று வருகின்றனர்.

இவ்வழியாகத்தான நாள்தோறும் லட்சக் கணகான மக்கள் வேலைகளுக்கும், அலுவலகங்களுக்கும், கடைகளுக்கும், விற்பனைக்கும் சென்று வருகின்றனர்.

இந்த காந்தி சிலை போக்குவரத்து நெருக்கடியைத் தாண்டிதான் ஆயிரக்கணகான நோயாளிகள் நாள்தோறும் அரசு தலைமை மருத்துவமனைக்கு சென்று உயிர்பிழைத்து வருகிறார்கள்.

இவ்வளவு மையமான பகுதியில் நெருக்கடியாக இருந்ததால்தான் புதிய நகராட்சி அலுவலகம் கட்டப்பட்டு மாற்றப்பட்டது. பழைய நகராட்சி கட்டிடத்தில் வருவாய் ஆய்வாளர் அலுவலகமும், ஆதார் மையமும் செயல்பட்டு வந்தது.

இந்நிலையில் திடீரென பழையக அலுவலகம் இடிக்கப்பட்டு, அவ்விடத்தில் வணிக வளாகம் கட்டப்பட உள்ளதாக செய்தி வெளியாகியுள்ளது.

காந்தி சிலை எப்போதும் 5 முனை சந்திப்பும் போக்குவரத்து நெருக்கடி மிகுந்த பகுதியாக உள்ளது. காந்தி சிலைக்குப் பின்பகுதியில் ஒரு சர்ச் உள்ளது. அதன் பின்பக்கம் சுமார் 66 கோடியில் கட்டிமுடிக்கப்பட்டு திறப்பு விழாவிற்காக காத்திருக்கும் மாவட்ட அரசு தலைமை மருத்துவ மனை உள்ளது.

இந்த வணிக வளாகம் இவ்விடத்தில் கட்டப்படுவதால் நகர மக்களுக்கு எவ்வித நலனும் பயனும் கிடைக்கப்போவதில்லை. மாறாக, அரசியல், சாதி, பணம் ஆகிய செல்வாக்கு மிகுந்தவர்களுக்குதான் இந்த வணிக வளாகத்தால் பலனும், பயனும், நலனும் கிடைக்கும். இவ்விழாவிற்கு நகராட்சியின் துணைத் தலைவர் (வி.சி.க கட்சி) அழைக்கப்படாதது ஒரு உதாரணம்.

சாதாராண மக்கள் கடுமையாக பாதிக்கப்படுவார்கள். அதிலும் மாவட்ட தலைமை மருத்துவமனைக்கு Golden hour நேரத்தில் ஆம்புலன்ஸ் மற்றும் நோயாளிகள் செல்வதற்கான வழியில்லாமல் ஆபத்தில் சிக்குவார்கள். உயிரிழப்புகள் ஏற்படும்.

எனவே,

1. புதியாக கட்டப்பட உள்ள வணிக வளாகத்தை திண்டிவனம் நகரின் எதிர்கால வளர்ச்சி நலன்களை கருதி வேறு இடத்தில் கட்டப்படவேண்டும்.

2. வெயில், மழை, காற்று, குளிர் போன்ற நேரங்களில் மக்கள் மற்றும் அருகிலுள்ள மருத்துவமனை நோயாளிகள் ஒதுங்கி நிற்க, ஓய்வெடுக்கும் வகையில் முழுமையாக நிழற்கூடமை அமைக்கலாம்.

4. ஆயிரக்கணகான பொது மக்கள் மற்றும் மருத்துவ மனை நோயாளிகளுக்கு பலன் அளிக்கும் வகையில் அம்மா உணவகத்தை இவ்விடத்தில் நடத்தலாம்.

5.வேறு இடமில்லாமல் சாலையோரம் நிறுத்தப்படுகின்ற ஆட்டோக்களை நிறுவதற்கான இடம் அமைத்துக் கொடுக்கலாம்.

இதுபோன்ற மக்கள் பயன்பாட்டு திட்டங்களை செயல்படுத்தி, பொதுமக்களின் நலன் மற்றும் பாதுகாப்பிற்கு இவ்விடத்தை பயன்படுத்திட வேண்டும். திண்டிவனம் நகரின் வெளியே புதிய வணிக வளாகம் கட்டப்பட்டால் நகரம் விரிவடையும், வளர்ச்சியடையும். போக்குவரத்து நெருக்கடி குறையும்.